Dou-bos la nuoba d’hoije cun dous stados d’alma cuntrairos. Puode parecer ua cousa defícel de antender, mas ne l fin, la maiorie bai a dar-me rezon. Ye cun alegrie que bos traio esta ambora de l carocho i de la bielha, fiesta que se faç to ls anhos an Cunstantin. Ye ua fiesta de las mais amportantes i cun mais tradiçon i cultura de las que se fázen neste tiempo.
L carocho i la bielha dan la buolta al pobo
Ls pouliteiros dánçan a las puortas para que l déien algo
Nesta fiesta partecipa todo l pobo de la aldé i muita giente que ben de bárias partes de Pertual i de l stranjeiro. Ye ua fiesta de l solstício de l Ambierno, assi cumo la maiorie de las que se fázen ne ls dies a seguir al Natal. L próprio Natal, fui antes de nacer l Nino Jasus, la grande fiesta de l solstício de Ambierno.
L carocho yá lieba un cacho de cochino
La bielha spera a la puorta por ua chouriça
L Crestianismo soubo aporbeitar todas estas fiestas para las tornar, fiestas de la Eigeija. Mas eilhas solo se mantubírun, porque éran fiestas cun la sue raiç ne l mais fondo de la tradiçon popular, mesmo quando quejírun acabar cun eilhas, renacíen siempre i fúrun passando de pais para filhos. Son las fiestas de Dues Eigreijas, la fiesta de la Bielha, an Bila Chana, chocalheiro, an Bemposta.
L carocho i la bielha
Ne l fin de la missa ye la daça, ne l meio de l córreo de giente
Mas las maiores de l percípio de l séclo passado, las scapadas de Sendin i la de ls rapazes de la Pruoba, stan adormecidas. Ye por esto que tengo un sentimento de tristeza. Cumo l Cristianismo, tamien hoije, ls partidos políticos arremánsan alguas para cun eilhas se amostráren, mas nun ye tradiçon nin cultura, son fiestas, que cumo foguetes, stouran i fázen muito strondo, mas apágan-se cun las eileiçones i la mudança de l mando.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
