Este anho la caminada de l fin d’anho, que se chamou l’outranho, tomba ladeiras , porque fui camino al riu i a la capielha de San Paulo, este anho fui pul praino caras a la Trindade – Prado Gaton i Atanor, regressando a Sendin por l camino de ls juncos, mas cumo l camino staba rui, salírun na Manga de baixo, camino a la tapada de tiu Bacislau i benírun zde alhi, por la strada de Atanor a Sendin.
Gueiteiro fui de ls purmeiros a salir
Camino de la Trindade
Para alhá de la caminada, que ye siempre ua atibidade çportiba amportante, besitórun-se muitos sítios nomeados que se ancuntrában pul camino i fizo-se un cuncurso a que se chamou – caça las alforjas- i que cunsistiu an cada grupo de siete, tener de ancuntrar locales ou cousas andicadas nun roteiro que recebírun antes de partir.
Na Trindade fui l fin de la purmeira eitapa
Un de ls grupos
Estes decifrában l roteiro
A cada caminante fui dado un palo cun l nome de la Associaçon Mirai Q’alforjas , que fui la ourganizadora de la caminada. Partecipórun muitos moços i moças i alguns mais bielhos, l HOIJE tubo alhá l sou repórtre, que tirou muitos retratos de toda la caminada. You cumo andaba a fazer l azeite, solo fui a parte de la caminada i tube pena nun fazer todo l percurso.
An Atanor
L grupo camino de Sendin
Ls de la frente
An Atanor fui l’almuorço, na Associaçon d’alhá, que colaborou cun la einiciatiba de la Mirai Q’alforjas i a la tarde, an Sendin fui la merenda. Pena que muitos de ls que dízen defender la cultura i Sendin i las atibidades, solo se béian onde hai jornales ou telebison para mostrar que stan alhá.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
