Todos ls anhos la Associaçon de ls Bumbeiros de Sendin faç ua cena de Natal i ye questume, nesse die, dar ls cumbites de Natal als filhos de ls bumbeiros. Este anho por cousa de la muorte de l srº. Almeida i porque fui poucos dies antes de l die marcado para la cena, por buntade de todos, nun se fizo la cena. Mas achou-se ua maneira oureginal de dar ls cumbites.
Este inda staba a drumir quando l batíun a la puorta
Eiqui fui la abó que la recebiu
Pur la manhana cedo, ls bumbeiros fúrun a la casa de ls que tenien filhos cun menos de dieç anhos i sien que ls garoticos i garoticas soubíssen, chamórun i antregórun-le ls cumbites de Natal. Uns stában a drumir i salírun inda an roupa de drumir, outros, mais madrugadores beníen a la puorta cun la alegrie na cara.
Todo cuntento a tirar l retrato
Estas nin se fala
Fui ua maneira special de dar ls cumbites de Natal, mas que deixou ls ninos i ninas todos ademirados i cuntentos. L menino Jesus siempre trouxe las prendas, outros quedórun a pensar que fui l Pai Natal que pasou puls Bumbeiros i l bumbeiro de serbício bino a casa traer-las.
Esta parece que staba a la spera
I destes dous qual l que quedou mais cuntento?
Son estas pequeinhas cousas que fázen criar ua amizade grande antre todos i ye assi que zde pequeinhos se ansínan ls mais nuobos a gustar de la Associaçon. Ye tamien mais ua mostra de que Sendin sabe fazer las cousas i ls sendineses sáben dar la buolta por riba a las cuntradiçones de la bida.
Ye pequeinha, mas yá sabe que ye un cumbite
Parece-le que l cumbite ye grande de mais
I assi se passou mais un die an Sendin, onde parece que hai siempre ua ambora para bós. Que siempre que podierdes, bengais a ber l HOIJE, que algo de nuobo, haberá siempre para ber.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
