Siempre assi fui i cuntinará anquanto la tradiçon se mantubir. Yá muitas bezes se quijo acabar cun las fogueiras, mas eilhas ténen rejistido durante séclos. Será porque l fuogo faç parte de la naturaleza de las cousas? Ou porque ten algo de mágico? Nun ye esso que amporta para la nuoba d’hoije, amporta ye la fogueira de Natal.
Uns dies antes ajuntórun la leinha atrás de l semitério
Agora ye solo cargar un trator para la lebar pal Sagrado
To ls anhos se scribe subre la fogueira i de todo l que se passa alredor deilha, mas pouco se diç de l que hai que fazer para haber fogueira. Ye desso que bos dou amboras neste die. D’atrás íban a buscar la leinha cun carros de bacas ou de mulas i antes desso irien solo cun burras ou mulas, mas agora ye cun tratores.
L trator cargado de leinha yá ne l Sagrado
Tamien d’atrás se cargában a la mano, mas hoije ye cun máquinas. Todo bai demudando, mas l home ye que ten que fazer l percipal, que ye ourganizar i ourientar ls trabalhos. Por esso hai ls mardomos todos ls anhos, que ne ls dies antes ténen que matar la cabeça a saber onde ancuntrar la leinha i ls que la irán a buscar.
La fogueira bai cumpuosta
Todo pronto ye solo chiscar
I ls mardomos fúrun a almuorçar
Quando mos arrumamos a la fogueira pouco pensamos ne l trabalho que fui perciso para la fogueira star a arder. Todo parece fácele, mas hai que saber cumo son feitas las cousas, para mos darmos cunta de l balor que ténen. Fui por las aldés alredor i por todo lado, uns poucos trabalhában para que manhana todo cuorra bien.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
