Quando tanto se fala an cultura i tradiçones i porque stamos nun tiempo, an que las tradiçones culturales i percipalmente la música son reinas, nada melhor que dar-bos esta nuoba, que por cierto bai a deixar ls sendineses cuntentos.
L CD de l Pica Tumilho
La banda i las músicas
Sendin siempre tubo tradiçon musical i ls purmeiros cunjuntos de l Nordeste nacírun eiqui. Mas la Agrícola Rock Band ye ua de las que hoije ten mais fama. Sendin ourgulha-se de tener yá muita bariadade de bandas i musicas, que móstran que Sendin ye grande an todo. Yá hai muito CD grabado i bários cunjuntos i coros.
L CD de ls Lenga-Lenga
Las músicas grabadas al bibo
Todo esto ten sido possible porque ls sendineses siempre aperciórun la música i siempre houbo quien tocasse. Mas fui cun l Centro de Cultura Regional – Sons da Terra , que la música se tornou nua atibidade amportante i cun pies i cabeça. Hoije l Centro ye ua refréncia an todo l Norte de Pertual. I Sendin ye ua tierra de cultura musical.
L CD tradições de Natal
Las músicas i las tradiçones
Este CD fui un de ls últimos a ser eiditado i ben a traer a todos, l que de melhor hai nas tradiçones i nas canti(g)as de Natal.
Quien nun se lembra de las scapadas i de la fogueira de Natal?
De gritar “ biba la gaita! Uh!...Uh!... ”?
De cantar na Missa de l Galho, las canti(g)as “ beijai o menino… ”, “ cristãos alegria… ”, “ bendito e louvado seja… ”?
Todo stá neste CD que l “Sons da Terra” i la Junta oufercírun, neste Natal.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia -ão.
