Quando hai deficuldades ye que se bei quien sabe rejistir, mas nun ye fácele. Fui ber l castro de la Cigaduonha, an Picuote i quedei a pensar naqueilho que yá muito habie bisto, mas que hoije me pareciu tan claro. L castro de la Cigaduonha fui un pobo mui anti(g)o i que hoije nun passa de un monte de piedras. Mas a la antrada staba portegido por piedras fincadas, para tornar defícele chegar alhá.
Placa a la antrada de l castro
Restros de cunstruciones
Tamien hoije ls caminos de la bida stan chenos de piedras, mas para tornar defícele l caminar de l pobo. Por esso ye defícele l tiempo que stamos a atrabessar, porque ls anteresses anstalados pónen cada beç mais calhaus para se defendéren. Mas hai que rejistir i cun trabalho hounesto todo se cunsigue.
Léngua mirandesa
La nuossa Copratiba ten dado un grande upa a la léngua mirandesa i al sou bino. Este bino fui mais un, apuis de ls seis yá premiados, a recebir mais un galardon. Bino de purmeira scuolha , que outelizando ua de las melhores marcas de l Praino, que ye la nuossa léngua, torna la nuossa region mais coincida i apetecida.
L cartaç de buonas fiestas
Lançado por la Copratiba, an colaboraçon cun l Minipreço, l Euromarché i alguas ampresas de binos, neste período de Natal i Anho Nuobo, stá a ser ua de las prendas mais scolhidas para ouferecer. La marca, Léngua mirandesa , solo ne l cunceilho de Miranda, bendiu yá tantas caixas, cumo 20% de ls eileitores.
L nuosso cunceilho stá cun la sue léngua i l sou bino. Mas Mogadouro stá tamien a rendir-se a la purmeira scuolha – Léngua mirandesa – 2007 -.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia -ão.
