I LS QUE YÁ NUN PUODEN I PERCÍSAN?
Ls que puoden dében ajudar als que percísan i inda cun mais rezon, se aqueilhes que percísan son nuossos familiares. La família yá nun ye cumo d’atrás, porque la bida bai demudando i l modo de bibir tamien. Nun ye la politica ou las eidologies que fázen demudar las cousas, ye l tiempo. L Ouniberso ye un ser bibo i cumo tal, bai an cada die, sendo çfrente.
L Lar de Sendin
Inda hai quien querga dezir que nun ye assi, mas nada puode tornar para trás. I nun podemos tener miedo desso, debemos ye mirar até alantre i pensar que la bida, cada beç será melhor. Las famílias yá nun puoden tratar por eilhas solas ls mais nuobos ou ls mais bielhos, mas ban-se criando anstituiçones para ajudar.
L Lar de Picuote
Nas tierras maiores yá hai lares para ls mais bielhos i creches para ls mais nuobos, cumo acuntece an Sendin i Picuote, an Dues Eigreijas i San Martino, an Miranda i Palaçuolo. Stube hoije an Miranda i l Probedor de la Misericórdia, mostru-me la nuoba ounidade de cuidados cuntinados . Stá ua cousa amportante i que muito bai ajudar las famílias.
La Ounidade de Cuidados Cuntinados
Esta Ounidade bai a recebir ls doentes que percísan de tratamentos ou de cuidados durante todo l die. Ye onde era l spital de Miranda. Cada beç l nuosso cunceilho bai tenendo melhores cundiçones de bida. Sin estes serbícios muita giente tenerie muitas deficuldades para tratar de ls sous.
Neste Natal nun bos squeçades de botar ua mano, ou ajudar cun qualquiera cousa, ls que percísan i percipalmente ls buossos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia -ão.
