Saliu l jornal de la scuola EBI de Sendin – L POULITEIRO – i podemos ougulhar-mos de l que ls alunos fazírun, quier por la apersentaçon, quier por ls temas de l jornal. Ne l jornal partecipórun ls alunos de las scuolas de Sendin i de bários anhos i cumo nun podie deixar de acuntecer, tubo la colaboraçon dels porsores, ampregados de la secretarie i la ourientaçon de l Cunseilho Diretibo.
La capa (ampression de la Cámara)
L contra capa
Fúrun bariados ls temas, l que mostra l trabalho de todos, mas hai temas que bale la pena ler porque son trabalhos amportantes para la formacion de ls alunos i ten inda amboras de todo l que se fizo nas scuolas zde l percípio de l anho.
L índece de todo
La léngua mirandesa tamien stá bien repersentada cun trés páiginas, ua subre l cemaque i la aldé de Augas Bibas, outra subre la feira de ls Grazes i outra subre l Natal. Nun las puodo poner todas, mas porque ls bersos son bien guapos pongo la de l Natal.
L Natal
La besita a la Copratiba tamien stá mui anteressante, mas l melhor ye ler l POULITEIRO i al mesmo tiempo, dais 50 céntimos para ancentibo de ls alunos, para ampeçáren de nuobos a saber que las cousas cústan denheiro i nun se puode star solo a la spera que mos déien todo de grácia.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
