La crise ye grande i bai chegando a todo l lado, mas Sendin, cumo siempre, stá porparado para la bencir. Durante centenas d’anhos la giente de l nuosso termo biu las sues bidas i las sues casas zaparecéren sien quedar rastro, mas siempre fui quedando quien tornasse a refazer todo. Stá ne ls genes de ls sendineses, rejistir.
La nuossa scuola faz la árbole de Natal
Nun ye por haber crise que se pára i cumo diç l pobo “ parar ye morrer ”, nun se puode parar. Tamien diç l pobo “ guarda de la canta (fartura) pa la chóra ” i “ retente na raiç ” i solo quien se fintou an quien nunca soube l que ye l trabalho pordutibo, passará mal. Quien nada ten pouco poderá benir a perder.
Na rue de Camino Prado hai un Pai Natal
Puode parecer que las pessonas nun se dan cunta de l que ende ben. Mas que ye que ben ende? Naide sabe, mas ls sendineses sáben que para tener de comer hai que fazer por las cousas. I se para bencir la crise hai que trabalhar, esso ls sendineses sáben fazer i bien. Que nun mos béngan roubar l sudor de l nuosso trabalho.
Mais ua casa a mostrar que ben ende l Natal
Para esses que dízen que falo assi porque tengo buona reforma, solo ls deixo estas preguntas :
- Ye por cousa de las reformas que hai crise, ou porque uns poucos roubórun melhones?
- Fui l trabalhador que fizo la crise, ou ls que todo fázen por querer mandar i nun béien um palmo a la frente de ls uolhos?
- Béien un garoto roubar un bolho para comer i nun se dan cunta de la falta de melhones, acraditais nesso?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
