Un bumbeiro de la nuossa Associaçon, apuis de mais un die de trabalho beluntairo, chega a casa i a la hora de cenar, inda cun la farda bestida, sentado cerca de la mulher, stremece i sien dar un ai, queda einanimado, la mulher grita, acúrren ls bezinos i ls sous colegas, bumbeiros. Mas nada habie a fazer, staba muorto.
L senhor Almeida
Era assi que todos l conhecien, senhor Almeida , un home que trabalhou cun muito sendinés na barraige de Picuote i que quando deixou de trabalhar alhi, se dedicou de alma i curaçon a la nuossa Associaçon. A qualquiera hora, staba siempre pronto para trabalhar. Yá dieç anhos que l fazie, cumo beluntairo.
A recebir la medalha de ls dieç anhos de buonos serbícios
Nun moraba an Sendin i nun era de Sendin, mas era un de ls grandes sendineses. Un home que toda la giente coincie i de que todos gustában - Un bun HOME -. Era bumbeiro de 3ª. classe – motorista, de l quadro de specialistas i ouciliares. Fui ua perda mui grande para todos nós. Bielhos i nuobos, ricos i probes, a todos trataba de eigual modo.
L sr. Almeida cun outros dous bumbeiros de Sendin
L anterro fui ua berdadeira manifestaçon de gratidon i de amizade para cun un Home que Sendin siempre guardará cumo un de ls melhores. Ls nuossos bumbeiros i ls de Miranda stubírun persentes, a mostráren l sou carinho para cun un deilhes que la muorte lebou. Mas nun fúrun solo ls bumbeiros, fúrun ls colegas de trabalho i la giente de todos ls pobos alredor de Sendin. Bien Haias, senhor Almeida , quedas siempre cun nós.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
