Mais un anho i la Copratiba cuntina de salude se bien que ls malinos cuntínen a querer botar-la abaixo. Quando hai 5 anhos esta direçon tomou cunta, las bozes de ls senhores de ls partidos de l cunceilho, fazien pouco i dezien que esta direçon iba a fazer l anterro de la Copratiba, que nadaba an dibidas.
Direçon i ampregados
Passados estes anhos las dibidas stan saldadas, l nome de la Copratiba ye respeitado i ls binos recíben prémios. La ounion antre direçon i ampregados puode ber-se nesta cena de Natal. Inda hai quien trabalhe para ls outros. Mas, ls i las de la fardela de piedras cuntinan scundidos ou chenos de arrogáncia a la spera. Nós yá sabemos l que quieren.
La cena fui buona i bien serbida por Eisidro
L HOIJE sabe que muitos porjetos stan a ser porparados, inda que contra la buntade de alguns i la direçon bai a fazer ua Assamblé para sclarecer todo. Perguntamos nós:
- Porque será que se atíran piedras a quien trabalha por l bien de Sendin i sien ganhar nada i se calha l que fázen ls que rouban l pobo?
Tamien fui serbido licor caseiro
Ne l fin de la cena todos salírun por l café onde habie muitos sócios i que quedórun cuntentos por ber ls ampregados i direçon de la Copratiba alhi, sien miedo nin bergonha i a cumbibir.
La maiorie de ls sendineses sáben bien l que quieren.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
