SENDIM – 0
Mais un jogo de l çtrital de futebol i l Sendin perdiu an Vila Flor por 1-0. Fui un jogo eiquelibrado, mas l Vila Flor a jogar ne l sou campo nuobo i yá cun yerba sintética, nun quijo perder l jogo. La Câmara gastou alhá muito denheiro i tenien que mostrar que baliu la pena tenéren campo nuobo.
La eiquipa de l Sendin (campo sien yerba)
Por todo l lado se ban fazendo nuobas cousas i a Sendin tamien l chegará la beç, mas tenemos que sperar que fágan l campo, purmeiro an Miranda. L Mirandés ten jogado ne l nuosso campo i nin sabemos cumo ten aguantado cun tanto jogo.
L campo de Vila Flor (retrato –Jornal Nordeste-)
La eiquipa de l Vila Flor, ne l campo bielho, 15 dies antes
Cumo podeis ber, hai ua grande çfréncia, ls jogadores tamien saben ber estas cousas i cada beç ye mais custoso que eilhes quérgan jogar an campos chenos de lodo i sujeitos a quedáren tolheitos. Até ls de Sendin jógan ne l Mogadouro i ne l Mirandela. Tenemos que poner yerba ne l nuosso campo, cumo fázen an todo l lado.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
