Yá quanta que andaba para bos dezir cumo ye esso de ls númaros de las casa i l nome de las rues de Sendin. L nome de las rues fui oufecializado quando you era persidente de la Junta i nesse tiempo a todas fui dado l nome que yá tenien ou l nome de l sitio. Las outras rues nuobas, fui la Junta cun la ajuda de ls moradores que le puso l nome.
L centro de Sendin
L númaro fui puosto de l seguinte modo i stá nua ata de la Assamblé de Freguesie:
1 – Ls númaros de las rues ampéçan a partir de l Largo de la Eigreija i estas son la rues percipales. A la dreita ls númaros pares i a la squierda ls impares.
2 – las outras rues ampéçan a partir de las percipales i assi por lantre.
3 – Ne ls largos ls númaros son seguidos i siguen la direçon de ls punteiros de l reloijo.
4 – Las caleijas (hai quien l chame trabiessas) ampéçan na rue que l dá l nome ou de la rue percipal.
Sendin para l lado de l semitério
Este retrato ye para ber i tener ua eideia melhor de cumo ye. La rue de Rei ampeça na rue de la Eirmita, porque esta ye percipal i ampeça ne l Largo de la Eigreija. La rue 1º. De Maio ampeça na rue de l Baiunco, porque esta ye percipal i tamien ampeça ne l Largo de la Eigreija.
Sendin bisto de l aire, ye mesmo ua Bila
Estes retratos yá ls pus ne l photoblog i ne l sitio de ls retratos, mas stan siempre a pedir-los. Por esso quédan eiqui para quien ls quejir copiar.
Ls de la fardela de piedras, cun sue mente malina, yá se porpáran. Yá ls beio a dezir:
-Yá anda a fazer campanha…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
