An tiempos de penúria, todo l trabalho ye pouco para que la bida tenga algun sentido, mas l que se bei ye aporbeitar las deficuldades, para bingáncias i treiçones. Para fazer pouco dels probes i ls ricos se tornáren ls duonhos de todo. Yá fui l que acunteciu mais bezes, an que por un alqueire de trio, se tomaba cunta de las glebas de l pobo.
La scuola EBI de Sendin
Tamien ls abutros aparécen, cun eideias de spráncia i de amparo de quien percisa, mas l que quíeren ye coutibar la giente para tomáren cunta de ls lugares de mando. I apuis de ls agarráren nun míran para outro lado que nun seia l sou umbelhigo. Mas ls ampergados de la nuossa scuola trabálhan sien mirar a essas cousas.
Un ampregado a fazer de jardineiro
La nuossa scuola puode ber-se, cun l jardin bien tratado i las anstalaçones limpas. Podeis dezir que esso ye l que dében fazer, mas la scuola nun ten jardineiros i an muitos sítios, sabemos que ls ampregados nun fázen mais que l sou trabalho.
Dezie a ber se nun queda bien
Las cousas bien feitas parécen bien, mas para stáren bien ye perciso tener gusto por eilhas i fazer a las bezes, mais que la nuossa oubrigaçon. Sabemos dezir l que stá mal i muitas bezes ponemos la culpa a quien nun la ten. Por esso hai que dezir bien de quien bien faç.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
