Nun sei se bos destes cunta que la eimage de la Eimaculada Cunceiçon que fazie parte de la nuoba de onte, era ua pintura de El Greco , pintor que bibiu antre (1541 – 1614). Naciu na Grécia i stubo an Itália, mas adonde se tornou un de ls maiores pintores, fui an Spanha. L HOIJE ten tamien la oubrigaçon de dar estas anformaçones.
La sagrada familhia
An muitas eigreijas por esse mundo afuora hai muita pintura i mesmo na nuossa capielha de Santo Cristo, hai ua pintura que ye ua obra d’arte. Yá bos la mostrei nun die an que screbi subre essa capielha. Mas muitos de bós nunca la fustes a ber i deberiedes ber-la i mostrar-la a quien nun la conhece.
La pintura de la capielha
Nuossa Senhora de las Dores
La purmeira pintura que bos mostro hoije, tamien ye de El Greco i fui para bos mostrar que arte ye arte i cabe an todo l lado, mesmo nas eigreijas. Mas l que you bos querie mostrar son las eimages de Nuossa Senhora que tenemos i que son tamien arte. Nun podemos ber la eigreija, solo cumo un sitio onde se bai a rezar, mas ua casa de arte i cultura. Un património que ls nuosssos abós mos deixórun i que debemos respeitar i amar.
Nuossa Senhora de l Rosáiro
Quando miramos para ua statua de piedra, nua rue, ou nun largo i porque mos dízen que repersenta un rei ou un scritor,ou un politico, miramos-la cun ademiraçon i achamos bien que se cunserbe, l mesmo fazemos a ua statua de piedra ou madeira, feitas por un curjidoso, pus las eimajes de la nuossa eigreija son tamien obras de arte i stá neilhas muito de la nuossa stória.
Nuossa Senhora de la Soledade
Als pies destas eimajes, muitos sendineses i sendinesas rezórun, chorórun i pedírun por outros i por eilhes. Ye un deber respeitar-las inda que nun tengamos fé, mas pul respeito als nuossos pais i abós, que las cunserbórun i mos las deixórun.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
