MORAIS -2
SENDIN -2
Sendin:
Louçano, Infesta, Adolfo (cap), Hugo, Moisés, Vítor, Ivo, Cavaleiro, David, Papa e Camané.
Jogórun inda: Gancho, Manuel, Toninho
Tr: Carlos Silva.
Morais:
Bruno, Inácio, Fanã (cap), Marcos, Luís, Miro, Filipe, Feija, Tó Mané, Reis e Renato.
Jogórun inda: Silva, Paulo, Louro
Tr: Fernandinho
Árbitos: Carlos Meco, Hélder Nogueiro, Jorge Felisberto.
Marcadores: Reis (15'), David (57'), Silva (76'), Papa (89').
Morais i Sendin ancuntrórun-se para la segunda mano de la eileminatória de la Taça de la AFB, que ls puso frente a frente. I inda que se houbisse registrado un ampate, l Morais seguiu adelantre, yá que habie ganhado la purmeira-mano pur ua bola a zero.
L campo staba malo i chobie
L jogo fui eiquelibrado
L jogo ampeçou bastante animado, dambas las eiquipas praticaban un futebol rápido, cun l Sendin a tener alguas ouportunidades para einaugurar l marcador. Mas serie l Morais a marcar l purmeiro golo, nua jogada que mos pareciu fuora de jogo. L anterbalo chegarie sin mais alteraçones, cun algua anjustiça para la eiquipa besitante, yá que l Sendin tubo bárias ouportunidades para ampatar la partida.
L Sendin jogaba bien, mesmo ne l campo de l Morais
Nin parecie que staba a jogar acontra l leader de l çtrital
Na segunda parte las eiquipas antrórun mais ua beç bastante bien, acabando pur ser un jogo muito anteressante de seguir, cun ouportunidades para dambos ls lados. David ampata la partida lougo ne l einício de la segunda parte. L Morais acelarou l jogo i a quinze minutos de l fin cunsigue de nuobo marcar. Mas la berdade ye que l jogo fui muito eiquelibrado i yá ne ls minutos finales l Sendin ampata, dando justiça al que fui l jogo.
David fizo un grande jogo
L Sendin lutou siempre até al fin
L árbito Carlos Meco stubo mui bien, parecendo star de nuobo al sou melhor nible, mostrando la rezon de ser árbito de categorie nacional. Pena que neste jogo ls sous fiscales de linha l houbíssen perjudicado cun alguns erros.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
