QUIEN FAÇ ANHOS?
Poucos saberán que fui nun die 5 de Dezembre que se formou la Associaçon de ls Bumbeiros de Sendin. Faç hoije 28 anhos, mas inda hai giente que nun perdona habermos criado essa Associaçon, cumo nun perdona habermos passado a bila, cumo nun perdona haber feito tanta cousa. Treidores todas las tierras ls ténen.
La purmeira apersentaçon
Fui ne l Sagrado i pul retrato podeis ber las pessonas que mais trabalhórun para la criaçon de ls Bumbeiros. Ne l quartel, stá ua placa cul nome de ls fundadores, mas falta ua al que fui la piedra percipal para la criaçon de ls Bumbeiros. L respunsáble por ls Bumbeiros de Pertual, nesse tiempo. Un filho desta tierra, Manuel Ramos que yá nun stá antre nós.
Quando inda nun habie quartel
Durante muitos anhos la Associaçon fui crecendo i hoije ye ua de las mais cunsideradas de Pertual. Sendin fui la purmeira aldé a tener bumbeiiros i ciclo i a ser bila i a tener auga i saneamento, ne l çtrito. La Associaçon de brebe se tornou ua de las melhores.
Ls bumbeiros
Tamien fui de las purmeiras a tener ua fanfarra i nun fui por acaso que para ampeçar, fúrun ls mesmos a arranjar las cousas. Hoije la fanfarra ye coincida por todo l paiç i adonde bai, ye Sendin que ye falado, nun son ls que tócan ou ls que mándan. La giente diç, ye la fanfarra de ls Bumbeiros de Sendin.
Ls eilementos de la fanfarra
Nun gustarie de haber ampeçado cumo ampecei, mas yá ye tiempo de mostrar a uns poucos, que nada pára l pobo i l pobo sendinés ten ua alma mui grande i ama de mais la sue tierra, para cuntinar caras al feturo, siempre na delantreira.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
