Na scuola EB 2/3 de Sendin i na scuola de l purmeiro ciclo hai classes de mirandés. Para quien nun sabe ye buono que se anforme, que l mirandés ye ansinado nas scuolas de Sendin i Miranda. Son bárias classes, cun alunos de bárias aldés de l cunceilho. I ls porsores fázen atibidades para poner ls alunos delantre de las situaçones reales para daprendéren melhor.
L ciclo de l’azeite
Yá eiqui bos mostrei un strelóquio an mirandés, repersentado por ls alunos i yá bos mostrei ls jogos tradicionales, hoije mostro-bos ua sposiçon subre l azeite. Ten la repersentaçon de la apanha de la azeituna, cun las mantas i la bara. Ls alunos mostrórun cumo se fazie.
A apanhar la azeituna
Para daprendéren ls nomes de todo, fazírun ua prensa, an carton i cumo podeis ber ten las piedras de moler la azeituna i la prensa onde se aperta la massa. Tamien nun faltou la seira onde se pon la massa, para ser apertada i salir l’azeite.
Las piedras de moler
La prensa
Todo fui feio por ls alunos, cun la ourientaçon de l porsor Emílio. Ye siempre anteressante fazer estas cousas i al mesmo tiempo, falar de ls lagares bielhos, an que las piedras éran puxadas por bacas i l’azeite era apartado an pilas de piedra. Hoije ya tenemos ua prensa cuntina, mas hai que saber cumo fui d’atrás.
A aparar l azeite pal cântaro i al lado la tinalha
Quando tenien todo pronto, lougo me chamórun para ber i fazer la reportage. Cumo an todos ls lados, todos se arrimórun para quedar ne l retrato. Ye por estas i por outras que Sendin ye çfrente. Todo bai bien quando l que las pessonas quieren ye partecipar i colaborar uas cun las outras.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
