Yá bos dei la nuoba de l camino que se stá a fazer pal Pilo i que bai a salir a la strada. Ye ua obra amportante i stá a ser feito de modo a quedar nalguns sitio, cun uito metros, la strada para Mogadouro nun ls ten. Hoije l die staba tamien buono i dou para ir a ber cumo quedaba.
Bun trabalho
Para ls dous lados
Quedei cuntento porque la meiorie ten stado cun la Junta, dando terreno onde ye perciso, mas hai siempre ls que quíeren todo i nun dan un palmo de tierra. A pagar para alargar nun hai denheiro que chegue i anton nunca se fazie nada. Ten sido esse modo de ber las cousas, na outras oucasiones, que ten deixado Sendin para trás. Todos sabemos quanto quedou por fazer, porque dous ou três son agananciosos.
Este ye l camino para la Baqueira
Muito se falou de l camino de la Baqueira, you nun staba acá i nun puodo dezir cumo se passórun las cousas, mas que solo son curbas i que nalguns sítios solo cabe un carro, ye berdade, mas que se fazírun buonas antradas para las tierras i huortas, tamien ye berdade.
Solo cabe un carro
Cumo podeis ber, hai muitos modos de trabalhar i de fazer las cousas, mas quando se fázen cun la ajuda de l pobo todo se torna mais fácele.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
