Apuis de la niebe i de la chuba, bieno un die de guarda buono i la giente nun se çcuidou i aporbeitando ls que benírun a passar este fin de semana maior, tratou de ir a azeitunas. Ls storninos son muitos i pápan todo quanto hai pul termo. Por outro lado la prensa yá ampeça a moler la azeituna ne l die 4 i ye tiempo.
Para muitos fui un “fuca…fuca””
Pul termo la giente era muita
Cada beç hai menos a quien chamar i hai que aporbeitar ls fins de semana para fazer ls trabalhos de l campo. Siempre bénen ls filhos ou ls que stan fuora para dar ua ajuda. Cumo hai tamien muitos que ténen l sou amprego, ne l fin de semana ye que fázen ls trabalhos de l campo.
La manta i la bara, todos lebában
Carros i carrinhas íban a todo lado
Muitos pregúntan para quei tanta priessa, mas solo quien bibe estas cousas sabe l que ye l trabalho de l campo. Nun se puoden fazer las cousas cumo la giente quier, hai siempre mil i un porblemas. Ye l tiempo, son las malinas, ye la falta de giente, que nun s’acha quando se quier. La bida ansinou a nun deixar para l’outro die l que ten que fazer.
Outros fúrun de trator
Apanhórun-se muita saca d’azeitunas i a la nuite l die staba ganho, mas para muitos nin houbo tiempo de çcansar, habie que regressar a las tierras onde trabálhan. Mas nun deixórun de lebar yá uas tabafeias ou uas chouriças.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
