EL HAI CADA COUSA!
Cumo l die stá brabo i friu, que nin ls perros ándan na rue, pensei amostrar-bos hoije uas cousas anteressantes que un die destes bi i que achei que ides a gustar de ber. Uns retratos ban a lembrar-bos ciertas cousas i outros ban a fazer-bos pensar noutras.
Esta fraga ye nas arribas
Mirando para las cousas, muitas bezes nin mos damos cunta de l que puoden tener de anteressante i mesmo de la giente que passa por nós, nun reparamos neilha, inda que por bezes séian nuossos conhecidos. Passamos pul mundo a pensar solo an nós. Hai eicessones i you ademiro muito a quien faç causo de todo.
Ua puorta
Ne l purmeiro retrato podeis ber que la fraga parece mesmo ua cabeça. Talbeç solo se beia de donde you tirei l retrato, mas tal cumo l dous que se bei nas arribas, an Miranda, tamien desta cabeça, hai que dezir onde stá i cumo la ber, se nó naide dá cunta que eisiste.
Este todos sabeis l que ye
L segundo retrato ye de ua puorta, mas mirando bien, dezi alhá se nun ye ua capa d’honras? Stá an Lagoaça, tierra onde dízen que bibiu giente que tenie que ber cun Sendin. Quando ancuntrórun las libras acá, dezie-se que habie mais scundidas an Lagoaça. Tamien ye cierto que son tierras de l Praino, mas esta de fazéren la puota assi, ten ls sous quenhientos.
Por cousa destes ye que todo mundo apanha las azeitunas
La boladeira stá nua oulibeira para ls spantar, mas nun se puode poner ua an cada oulibeira. Estas boladeiras tamien serbíen para saber de que lado sopraba l aire, cumo bedes inda hai quien las faga.
El hai cada cousa…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
