La casa de la cultura que cumo muitos yá sáben, ye onde fui la scuola bielha, an Camino Prado, junto al cruzeiro. Nun ten sido muito outelizada, porque nun hai muita possiblidade de tener ua pessona a tomar cunta deilha, mas tamien porque la giente nun ten l’hábito de ir alhá i muitas bezes nun hai anteresse de se fazéren cousas.
Ua sposiçon de pordutos biológicos
Ua mostra de outras sposiçones
Muitos cuídan que muito se poderie fazer, mas son ls purmeiros a nun ir a ber las sposiçones se nun fúren deilhes ou de ls sous amigos. Todos ls jornales ténen un sitio para screbir subre outras cousas que nó las amboras de l die i l HOIJE tamien ten que screbir subre estas cousas. Tamien, outros, dízen que se podie fazer…,mas porque ténen ajudas que nós nun tenemos. Por esso la Junta i las associaçones fázen muito. Sendin ye eisemplo i mais nada.
Jorge Cacharuolo parece cuntento de ber
Esta sposiçon fui ua de las melhores que se ténen feito i tubo muita giente a ber-la, mas l mais amportante fui l que alhá se mostrou i que fui ua berdadeira leçon para todos ls que cuídan que la agricultura nun ten feturo ou nun ten soluçones. Cada beç son mais ls que defénden l’ambiente i la ecologie.
L bereador Carção parecie anteressado
Ls porblemas de la ecologie ténen, cada beç mais, de ser de toda la giente i nó de ls partidos ou de ls eiluminados. Todos tenemos que fazer l melhor para que l mundo seia mais puro i saludáble.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
