Ls bumbeiros de Sendin stan siempre an formaçon i quando nun son ls nuobos son ls bielhos, porque ne ls bumbeiros hai bárias categories i nun se passa de uas para las outras sin tener feito formaçon i eisame, para alhá de la abaliaçon de l sou trabalho que ye feita por la Associaçon i l comando.
La formatura stá pronta
Cun tantas atibidades que houbo i porque nalguas tubimos que star persentes, nun fui possible tirar retratos a todas las atibidades, mas l que amporta ye dar la nuoba i mostrar l que se passou ou se stá a passar, an Sendin.
L eisaminador stá atento i Toninho tamien
Ls bumbeiros fazírun bárias probas teóricas i práticas para podéren passar a bumbeiros de segunda i purmeira categorie. Las práticas fúrun cun mangueiras, para sabéren cumo las outelizar i nun se cuide que ye ua cousa assi tan simpre, porque nun fuogo aparécen situaçones tan cumplicadas, que hai mesmo que saber.
Aquilino a mostrar l que sabie
Outra proba prática fui cun airicos, que son para usar quando l aire nun se puode respirar ou quando hai fumos ou gazes tóxicos. Mas tamien hai que star porparado para dar ordes i para saber mandar i respeitar l comando, por esso ye tamien mui amportante la formatura.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
