L die 8 de Dezembre ye nomeado porque ye die santo de guarda i porque se faç la fiesta de Nuossa Senhora de la Eimaculada Cunceiçon. La fiesta ye ne l percípio de l anho litúrgico, l Adbento, l tiempo antes de l Natal. Fui l papa Clemente XI, que an 1708 la tornou oubrigatória an toda la Cristianidade.
La Eimaculada Cunceiçon – El Greco
Sendin siempre guardou l die la Eimaculada Cunceiçon i an alguas tierras de l Praino fazien mesmo fiesta, mas nunca se anraizou muito, porque yá habie la fiesta de Nuossa Senhora de l Rosairo i esta siempre fui la fiesta meior de Nuossa Senhora. Fiesta an que partecipában ls pouliteiros.
Ls pouliteiros
Este die quedou die nomeado, an Pertual, porque D. Juan IV oufecializou l culto i puso la corona real als pies de Nuossa Senhora i la fizo padroneira de Pertual. La Santa padroneira de Bila Biçosa, fui coronada por el i zde esse die, nunca mais nanhun rei de Pertual puso la corona na cabeça. La reina eiterna passou a ser Nuossa Senhora.
D Juan IV (quadro do museu de Bila Biçosa)
L culto a Nuossa Senhora por tierras de Miranda ben zde l percípio de la cristianizaçon deste termo. Deixo-bos cun estes lindos bersos de l Pe. Mourinho:
Quien bos truxo a estas tierras
De preinadas i rincones,
Cun sudores i canseiras,
Por tropieços i scalones,
Antre touças i ladeiras?...
Nun fúrun frius d’eimbernadas
Nien muortas niebes de sierras…
Fui un sol de madrugada
Que yá ye mais q’alborada…
- Fui ua chama bendita,
Onde la Grácia anda biba
I la bida mais que scrita!...
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
