Declaracion Ounibersal de ls Dreitos Houmanos
Faç 60 anhos que fui aprobada por la ONU i durante todos estes anhos muito se ten falado i screbido, mas tanto hai inda por fazer. Neste die, por todo l lado i an melhares de jornales i blogs se fala neste die i muita giente fala de dreitos houmanos, mas nunca chegou a salir del artigo purmeiro.
La declaración atada cun ua fita burmeilha
Diç l artigo purmeiro:
Todos ls seres houmanos nácen libres i eiguales an dinidade i dreitos i, dotados cumo stán de rezon i cuncência, dében cumportar-se fraternalmente uns cun ls outros.
Deixo solo esta pregunta:
Puode falar an dreitos humanos quien anda siempre cun ua fardela de piedras para poder atirar al purmeiro que ancóntran?
Un trabalho coletibo de ls alunos de la EBI
L que inda hai por fazer
Diç l artigo 25:
1. Toda la pesson ten dreito a un modo de bida para poder tener el, i dar a la sue famílhia, la saúde i l bien-star, percipalmente quanto al quemer, al bestir, a la casa, a las medicinas i inda quanto als serbicios sociales neçáiros; i ten dreito a sigurança ne l zamprego, nas malinas, na ambalideç, na biudeç, na belhéç ou noutros causos de perda de teneres i haberes para bibir, por cousas fuora de la sue buntade.
2. La prenheç i la anfáncia ténen dreito a amparo i a acumpanhamento speciales. Todos ls ninos, nacidos drento ou fuora de l casamiento, ténen dreitos eiguales.
L cartaç a acupar-se cun bós
La caixa de las prendas yá stá a la spera
Cumo nun podie ser doutra maneira, na scuola EBI ls porsores fazírun un trabalho cun ls alunos i apuis de ber l muito que inda hai que fazer, decedírun acupar-se cun bós, para ls que mais percísan.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
