Mais ua jornada de futebol i l purmeiro de la Çtrital bino a Sendin. Por l que l Sendin ten feito este anho, todo parecie andicar que ganharie cun facelidade, mas l jogo fui bastante bien jogado i l Sendin nun merecie tener perdido l jogo.
L Morais antrou fuorte
Mas l Sendin debrebe tomou cunta de l jogo
Na purmeira metade de l jogo, l Sendin fui superior i solo la falta de puntarie de ls sous abançados fizo cun que l Morais fusse para l anterbalo cun l resultado an 0-0. L Sendin ten benido a subir de forma i apuis de la recuperaçon de ls jogadores que stában meio alancados, la eiquipa yá parece outra.
L Morais staba cerca de la sue baliza
Na segunda parte l Sendin cuntinaba a atacar
Na segunda metade l Sendin cuntinou a ser melhor, mas l Morais fizo un golo nua jogada de bola parada i a ganhar por 1-0, nada mais fizo que defender. L Sendin todo fizo para marcar un golo, mas staba naqueilhes dies, an que mesmo a jogar até a la meia nuite, la bola nun antraba.
Un libre peligroso acontra l Morais
L jogo acabou yá era quaije de nuite
L jogo acabou cun la bitória de l Morais por 1-0, mas la giente yá quedou cuntenta por ber que la eiquipa yá joga cun gana.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia -ão.
