I ESTA, HEIN!...
To ls anhos hai ua nuoba por esta altura i ls mardomos de la fogueira, fázen todo por traer algo defrente, ou ye la gorra cul galho, ou l gorro a la moda anti(g)a ou l cascol, sei alhá l que cada anho ambéntan, para que cada un compre alo i assi ajuntar para las çpesas de la fogueira i de las chouriças para assar, menos pal bino que ye la Copratiba que l dá.
Yá quantá que nun habie desto?
Las mulas al carro
Este anho ambentórun un modo de ir a pedir para la fogueira. Ounhírun ua junta de mulas i alá a puxar al carro pulas rues, cun ls gueiteiros de Sendin i ls mardomos bestidos a la moda anti(g)a, a dar la buolta al pobo. Las lácrimas inda aparcírun al canto de ls uolhos de ls bielhos. Soudades de la mocidade i de l tiempo que yá nun buolbe mais.
Un carro de mulas ne l Sagrado
Un de ls mardomos cul filho
Son estas cousas i estes sfregantes que fázen Sendin ser ua tierra special. Quando yá nin carros hai i mulas poucas, ls mardomos zancantórun ua relíquia destas an Sendin. Mas que ye que ls sendineses nun ténen ou nun son capazes de amanhar? Quejírun poner-los a drumir, mas yá ampéçan a sfregar ls uolhos.
Ls gueiteiros
Quien será esse tiu que bai ende?
Son estas tradiçones que hai que rebibir, sien anteresses scundidos ou para recebir subsídios i mostrar serbício als ” tenientes de la tierra”. Sendin ten que ser l Sendin de ls sendineses, la tierra libre i ourgulhosa que siempre fui.
La ronda pul Baiunco
I por Camino Prado
Que para l anho que bén, que outros fágan outra cousa nuoba ou eigual, mas que la déien mais a coincer, porque muita giente nun sabie i nun staba ou nun saliu a ber, porque las deficuldades yá se ampéçan a sentir i l toque de la gaita, querie dezir peditório i alguns yá pouco puoden dar. Mas para ber l carro, si que habíen salido.
Un cachico de bolo rei i ua pinga bien se agradeciu
Muitos quedórun cun pena de nun ber i ls que stan loinje nun l podíen fazer, mas l HOIJE staba alhá para bos l mostrar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia -ão.
