Lougo por la manhana se ampeçórun a ber ls garotos cun las fardelas de libros, correndo i saltando, Camino Prado alantre i por toda la Abenida de l Ciclo. Era l purmeiro die de scuola de l anho de 2009. Ne l miu tiempo solo ampeçában apuis de l die de reis, mas agora ye assi.
Ls garotos na Abenida de l Ciclo
A la hora de l recreio fui a ber las scuolas i lougo aparcírun a la antrada para que le tirasse un retrato. Todos parecíen cuntentos por ampeçar mais un período de scuola. Puode parecer mintira, mas todos stában felizes por buolber a tener aulas. Ber ls ami(g)os i ls porsores era amportante para eilhes.
A L’antrada de la scuola
Fui mais abaixo, al Ciclo i eiqui parecíen mais oucupados uns culs outros que cun l que se passaba na rue. Nin se dórun cunta que le tirei l retrato. Cumo todo me pareciu an orde, fui a saber doutras nuobas i solo buolbi a la tardica, quando yá stában a porparar-se para ir para casa.
Na hora de l recreio
A porparáren-se para ir para casa
La scuola ten atibidades até mui tarde i quando acabórun las aulas yá quaije era nuite. Tamien hai que ber que stamos ne l tiempo de ls dies pequeinhos. Yá ampéçan a crecer, mas inda pouco se nota. Para ls que ténen que ir para las aldés, alredor de Sendin, ye un porblema. Mas la bida ye mesmo assi.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
