L Sendin recebiu i perdiu cul Benhais por un zero, un resultado muito anjusto, puis a haber bencedor, tenerie de ser l Sendin! Ne ls purmeiros binte minutos de la partida, l jogo fui muito eiquelibrado, sin ouportunidades nin para ua nin para outra eiquipa. Ls jogadores lutórun muito i apesar de l malo stado de l campo, l jogo era bastante agradable.
La tarde staba buona
L campo ye que staba malo
Depuis l Benhais tornou-se mais peligroso i cumo l'eiquipa stá melhor classeficada ampeçou a ganhar cunfiança i até al anterbalo, tubo dues ó trés ouportunidades para se adelantar ne l marcador.
L Sendin atacou mais
Mas l campo tamien nun ajudaba
L segundo tiempo fui çfrente i l Sendin praticamente dominou la partida. Ne ls purmeiros 15 minutos podie tener marcado por mais de qu'ua beç, mas por falta de suorte ó por falta de catagorie, ls abançados nun cunseguíran marcar.
L jogo fazie-se ne l meio de l campo
Mas l balde d'auga frie serie yá ne l tiempo de çcuontos, quando l Benhais marca un libre fruntal i la bola entra pul meio de las piernas de l guarda-redes, naquel que tenerá sido l único remate de l Benhais ne l segundo tiempo. Mui anjusto este golo, puis l Sendin tubo muitas mais ouportunidades i merecie bencir la partida. Mas quien manda son ls golos i nesso, l Benhais cunseguiu un i l Sendin nanhun!
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
