Esta ye mais ua fiesta de l solstício de Ambierno, ne l die 1 de Janeiro de todos ls anhos, an Bila Chana. Ye an honra de l Nino jasus, mas yá eisistie antes del cristeanismo, la eigreija aporbeitou-se deilha para fazer la fiesta de ls Nino. Lougo por la manhana faç-se l peditório por la aldé, cun ls gueiteiros i la bielha, l pouliteiro i un rapaç bestido de mulher.
Ls gueiteiros por las rues
La bielha ye un home tisnado de negro na cara i nas manos i bestido cun ua saia de burel, anfeitada de rendas i bordados brancos, sapatos de bezerro i ua jaqueta, ou jaleco, tamien de burel, anfeitado de franjas i bordados brancos. Na cabeça un chapéu cun ua fita de seda i quatro palmitos, tal qual l de ls pouliteiros. Lieba un rosairo de bolhacas al cachaço, cu nua cruç de corcho quemado, para marcar als que nun dan la smola.
La bielha, l pouliteiro i l rapaç
Nua mano lieba ua staca de carbalho para colgar las chouriças que l ban dando i na outra mano, ua caiata cun un baston i que trai na puonta trés ou quatro bexigas de cochino, chenas de aire, cun que faç fugir l garotos i ls perros. L pouliteiro bai bestido de pouliteiro i l rapaç bai bestido de mulhier bien ampuosta, mas todos lieban na cabeça, chapéus eiguales.
Ls trés a beilar apuis de recebíren la smola
A seguir al peditório hai la missa i la precisson de l Nino,onde ban ls três, mas durante la precisson l rapaç bestido de mulhier, an beç de chapéu, pon un lenço i bai ne l meio de las mulhieres. Ne l fin de la precisson, ne l adro de la eigreija, faç-se la arremataçon de todo l que dórun na fiesta i apuis hai baile al toque de la gaita.
A dançáren l repasseado
A dançar agarrados
L gueiteiro, para cuntentar a todos, toca musicas tradicionales, cumo l repasseado, mas tamien músicas mais modernas, para todos podéren dançar la dança que mais l deia na gana. Ls três – la bielha, l rapaç i l pouliteiro – tamien dánçan ne l meio de la giente.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
