Yá zde onte a la nuite que la niebe tornou a caer, mas parecie meio ambergonhada. Talbeç porque pensaba na crise por que stamos a passar i tenie miedo de ls mais probes. Mas por la tarde dou-le la mosca i parecie mesmo un anxame de moscas a zunzinar por toda la parte. You iba caras a casa, de l Sagrado por la rue de l semitério i parei a tirar ls retratos.
Mirai cumo caie
Mas bieno un airico i anxotou-la de tal modo que parou de caer. Mas cumo todo quedou tan guapo fui a ber las outras rues i cheguei al Barreiro. Este anho parece que quedemos ne l lemite de la depresson i solo bamos apanhando cun uas forfalhas, mas que dá para passar friu, esso dá.
La rue Balentin Guerra
Cumo sei que gustais de ber Sendin cun niebe, porque la nuossa niebe parece siempre mais guapa, inda que por esse mundo afuora haba spetáclos marabelhosos, que la niebe i l gelo fázen. Ber la nuossa tierra ye siempre algo que mos deixa mais animados i ber-la assi inda mais.
Sendin bisto de l Barreiro
La niebe tamien faç falta i nun ye porque ls homes ténen ua sociadade anjusta, l que faç cun que la niebe seia un porblema para ls mais probes, eilha faç falta para la tierra i yá ls bielhos dezíen – medra l pan debaixo de la niebe, cumo l cordeiro debaixo de la piele – i dezien tamien –siete nebadas i un nebon, céban manantiales i dan pan.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
