La nuoba d’hoije ye para ls que hai muito nun ban puls caminos, ou porque hai muito que salírun d’acá ou porque nin tiempo ténen de ir a dar ua caminada por eilhes. Parece que la giente se bai zafazendo de todo i solo stá preacupada cun l modo de bida desta sociadade sien alma, que mos quier amofinar a todos. Por esso bos mostro estes retratos, para que nun bos deixeis amodorrar.
L camino de l bergel
L camino de l rosal
Yá passemos muitos trabalhos, yá ancalquemos muito camino i até ls ajudemos a fazer. Quantos de bós, ls mais bielhos, nun fustes a caminos? Si, ir a caminos era un uso d’atrás para fazer las cousas que éran de todos i para las quales nun habie denheiro. Todos tenien que dar un ou mais dies de trabalho. Mas cumo hoije, tamien ls ricos nun íban, pagában, mas uas ráspias que nin para cerilhas dában.
L camino del rincadeiro
L camino de la marrielha
Por todo esto ye que debeis lembrar ls caminos de Sendin, por onde andubírun ls nuosos pais i abós i para bos lembrardes siempre de la nuossa ourige. Ls retratos sírben tamien para berdes l termo i lembrar ls dies de canseira que por alhá passestes, muitas bezes tamien, a pensar ne que haberie para alhá de las bistas.
L camino pal granjo zde la galharda
L camino de las lagas
L camino de la baqueira
Muitos mais caminos haberie para mostrar, mas ye buono que penseis tamien neilhes. Mais ua beç fago un pedido als mais nuobos, falai desto als buossos abós i pais i lembrai-le todos estes nomes i mostrai-le ls retratos percipalmente als que stan loinje.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
