Este anho nun mos podemos queixar de falta de auga yá que ten chobido bien. Inda hoije l die ten sido de berdadeiro ambierno a la moda de quando you era pequeinho i que stabamos mais de 15 dies sien poder tirar ls animales de casa. Mas se chobie muito nun quier dezir que tubíssemos muita auga para bober.
La fuonte de la calçada
La fuonte de l lugar
La bica de l furo
Sendin fui siempre ua tierra cun muita falta de auga para la giente i al longo de ls anhos la giente sufriu muito por cousa de la auga. La fuonte de l lugar por ser ua fuonte de mergulho, quedaba facelmente cuntaminada i fui la causa de muitas malinas al longo de ls anhos. Solo cun la sploraçon de las nacientes de Funte de la Raposa, del Monte i de dels Fornos, que la canalizórun para l pobo, ye que se dou la purmeira melhorie na culidade de l’auga.
La bica de l Sagrado
La bica de Baixo
La bica de la scuola
La bica percipal quedaba ne l Sagrado onde habie tamien un tanque para ls animales bebéren. I cun essa fazírun la de la scuola i la bica de baixo. Para agarrar beç, tenie que se ir muitas bezes para la bica durante horas i nun éran ralas las bezes, an que nun habie que ber. Mas l tanque nun era tamien muito saludáble i cul tiempo acabou, mas la bica, de fierro fundido i de dous braços quedou, pena que la deixássen tirar para poner ua de piedra.
La bica de l Baiunco
La bica de la Armita
Estas dues aparecírun mais tarde i lougo a seguir ampeçorun a meter la auga canalizada , an todo l pobo, purmeiro era para benir de Augas Bibas, mas hoije ben de l riu. La ancanalizaçon de la auga fui ua de las melhores cousas que se fazírun. La stória de la auga ye ua cousa que ten que ser publicada. Hai bários studos, mas hai que ajuntar todo, porque muita giente trabalhou para esso i ten que se dar a coincer.
La bica de la GNR
La bica de l meio de l Baiunco
La bica al fondo del Baiunco
Estas trés fúrun las últimas. Podereis perguntar para que ye que se ponírun todas estas bicas, quando yá habie auga de la rede. Porque hai giente que cuntina a querer la auga de las nacientes i d’atrás, l depósito nunca chegaba a anchir-se para que la auga chegasse a todos ls sítios, mas hoije, cumo yá bai menos giente a las bicas, chega a todo l pobo, por outro lado fui fácel fazer esto, porque al andar cun las canalizaçones para la meter nas casas se aporbeitórun ls balados para meter ls canhos.
Mostrei tamien todas las bicas para que muita giente que nun sabie onde stában, l quedar a saber.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
