Purmanhana chobie que Dius la daba i quando assi acuntece nun hai muito por onde mirar, que fazer hai siempre, nins que seia screbir uas palabricas meio zordenadas, mas que dízen siempre algua cousa, inda que para alguns paréçan cumo ua cousa sien amportáncia.
Inda bos lembrais de ber?
I un ampeça a screbir i nin sabe l que bai a salir de l eimaranhado de palabras que bota ne l screbido. Mas la cabeça ou l cerbro, ándan a las buoltas i acában parando nua eideia que mos faç ancarreirar la scrita. L miu cerbro parou nesso a que cháman crise, cousa que dízen ser de todos, mas nun passa de mais un modo para ls tierra-tenientes de la sociadade tenéren pie de scrabisar mais a quien trabalha.
Juan toca la gaita
Cenas cumo la de l purmeiro retrato yá son ralas i nunca mais buolberemos a esse tiempo. Por esso nun dében serbir para mos meter miedo de buolber asté atrás, mas para serbíren de mantenéncia de l nuosso sprito de luta para anfrentar la tal crise i ls duonhos i respunsábles por eilha.
Era assi que cun niebe i friu iban a scuola d’atrás
L segundo i terceiro retratos son berdadeiras eimaiges de l tiempo que yá passou. L segundo era dun home que muitos julgában tonto, mas que nun passaba de un probe que la necidade oubrigaba a lebar essa bida. Quantos probes i miséria habie nesse tiempo? I agora ye crise , porque toca a quien nunca soubo l que era la bida. Nesse tiempo era l quei? L terceiro ye dun garoto que iba assi a la scuola, çcalço, an Janeiro. I agora porque nun puoden ir de sapatos de marca ye crise? Eiqui nun ye sitio de grandes çcuçones, nin de grandes filosofies, mas puode ser sitio para bos fazer pensar.
Para ti, que stás a dezir que las cousas nun son assi tan simple, queda sabendo que todo ye simple, zde que nun l cumplíquen.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
