Todos debemos tener proua de ser sendineses i cada beç mais tenemos que afirmar la nuossa eidentidade i nun ye por esso que deixamos de tener respeito por ls outros, zde que ls outros mos respéiten tamien, cumo diç l persidente Obama. Tamien, cumo giente de l Praino, somos de la Tierra de Miranda i por esso mirandeses de ls melhores.
L segundo libro de Emilio
De las bandeiras de toda la tierra de Miranda, tés son las maiores, la léngua, ls pouliteiros i la puosta. La léngua tubo siempre na delantreira sendineses, antre ls melhores. L Pe. Mourinho cun l sou studo i libros subre la léngua, Eimilio culs sous libros an sendinés i agora Amadeu Ferreira i sou filho Zé Pedro, que stan a fazer l maior studo que até hoije, se fizo de la léngua i l HOIJE (tamien tengo que agabar quien dá las nuobas).
L Pe. Mourinho ne ls USA (retrato de l Pe. Mourinho)
Ne ls pouliteiros fui tamien un sendinés que lebou la dança a todas las partes de l mundo. De tal modo gustaba de ls pouliteiros, que se bestiu tamien de pouliteiro, poucos conhecerán este retrato, por esso bos l traio eiqui.
La Gabriela a assar la puosta an Lisboua(retrato de l Pe. Mourinho)
Na puosta fui la Gabriela que la tornou coincida an todo l mundo. Apuis desto todo inda haberá quien diga que nun somos de ls melhores? Mesmo sien l mando , tenemos sabido mostrar la nuossa anteligéncia i sabedorie. Galardones nun percisamos, son pantominas, mostramos trabalho i yá mos chega.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
