Balantin era un sacerdote crestiano del tiempo del amperador romano Cláudio II. Cláudio querie costruir un eisército grande i fuorte. Nun cunseguindo lebar muitos romanos a alistáren-se, acraditou que tal sucedie porque ls homes nun se çponíen a abandonar las sues mulhieres i famílhias para partíren para la guerra. I la soluçon que ancontrou fui proibir ls casamientos de ls moços! San Balantin tenerá-se rebuolto acontra la orde amperial i, ajudado por S. Mário, tenerá casado alguns a las scundidas. Quando fui çcubierto, fui preso, acutilado i muorto a 14 de Febreiro.
San Balantin
Quanto a la tradiçon pagana, puode ajuntar-se cula stória de l mártere crestiano. Na Roma Anti(g)a, celebraba-se l 15 de Febreiro (que, ne l calendairo romano, coincidie mais ou menos cul ampeço de la Primabera) un festibal, ls Lupercalia . Na béspora desse die, éran metidos an cestos, papeles cul nome de las rapazas romanas. Cada rapaç tiraba un nome, i essa rapaza serie la sue «namorada» durante l festibal (ó, eibentualmente, durante l anho que se seguie).
Dous namorados a passar na mie rue
Neste die, por todo l mundo, ye l die dels namorados, yá l’outro anho screbi subre esso, mas hai siempre quien nun tenga lido ou quien nun saba la rezon de ser assi, por esso buolbo a screbir l que sei. Quedei cuntento de ber neste die passar a la mie puorta dous namorados.
Hai retratos lindos de las nuobas de l die dels namorados
L més de Febreiro ye cunsiderado l més namoradeiro i quien anda pul campo, ou bibe nas aldés, sabe que ye l tiempo de ls gatos i de las perdizes andáren a saber de pareilha, cumo staba un die de Sol, nun fui defícele ancuntrar ua perdiç.
La perdiç
L mundo serie melhor se todos nós, durante l anho soubissemos namorar todos ls dies. Nun ye solo l die 14 de Febreiro, deberie ser siempre l die de tener l coraçon abierto, sien rábia nin çcunfiança, mas cun amor i sentido de perdon.
Tamien puodo preguntar:
-Quantas mulhieres dan ua flor als sous homes?
-Quantos homes ténen tiempo de mirar para las sues mulhieres?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
