La Junta de Freguesie ten andado a cumponer ls carreirones a la borda del riu zde l parque náutico de Mondin até Forcaleiro. Muitos yá mal se coincien porque yá nun éren outelizados yá quantá. Inda me lembra del tiempo de la caseta de la guarda fiscal i de haber carreirones zde alhi até l’ancho de Mondin i un pouco mais abaixo, onde l riu astreitaba i se podie passar melhor.
L carreiron a la borda del riu
Al fondo l parque nautico
Para l lado de Forcaleiro habie tamien carreirones para la huorta de tiu Paxareiro i tiu Moguilho. Por lhi habie muita oulibeira i quaije todas las arribas stában chenas de pardones bien amanhados i para todos habie carreirones, mas por cousa de la barraige, fúrun sendo abandonados i muitos quedórun ambaixo d’auga.
L’ancho de Mondin
L carreiron para un pardon de oulibeiras
Hoije buolben a fazer falta, porque na Primabera i nel Berano muita giente bai pal riu a la pesca i até a caminar a la borda dél. Para ls carreirones séren mais seguros i limpos, de modo a dar a toda la giente que querga, la possiblidade de andar por alhi cun sigurança, la Junta anda fazer l trabalho de limpesa.
L carreiron caras a Forcaleiro
Ye un trabalho amportante i que quando chegar l tiempo buono yá ireis a ber cumo fui un trabalho neceçairo. Que apuis las pessonas ls outelízen, lembrando-se siempre que la cunserbaçon de la naturaleza ye un deber de todos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
