Quando se ampeça a falar de ua cousa, lougo aparécen outras que mos oubrígan a falar deilhas tamien. L porblema de la antiguidade de la eigreija de Sendin ye ua pergunta que se faç cada beç mais, apuis que falei de la capielha de San Sebastian poder tener sido recostruida nas ruínas de la purmeira eigreija.
L Santo Cristo de la eigreija de Sendin
Que Sendin yá tenie eigreija nel séclo XIII, nun hai dúbedas, que la eigreija que hoije tenemos ye muito mais nuoba, mesmo la purmeira costruçon nel sitio onde stá, tamien ye fácele de ber i saber, mas onde i quando tenerie sido costruida la purmeira eigreija? Ende stá ua cousa para ls nuobos studáren.
L Santo Cristo de la eigreija de Picuote
Porque apuis de falar subre la abaie de Sendin i nas eigreijas de Picuote i Ruolos, me ténen pedido para screbir mais subre esso, dou hoije mais ua de las anformaçones que tengo. La eimage del Santo Cristo de la eigreija de Sendin ye del séclo XIII, percípios del séclo XIV i ye ua eimage mui baliosa, lougo de ua eigreija amportante desse tiempo.
L Santo Cristo de la eigreija de Ruolos
L Santo Cristo de la eigreija de Picuote que stá an pie del semitério ye tamien desse tiempo i l Santo Cristo de la eigreija de Ruolos, ye cunsiderado inda mais anti(g)o, séclo XII – XIII. Son decumentos amportantes para podermos dezir que yá habie nesta region, eigreijas nel percípio de la nacionalidade. Todas tenéren eimages del Santo Cristo, cuido que ye outra anformaçon amportante.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
