Que palabra tan stranha esta. Mas ye mais ua ferramienta de la léngua mirandesa. Pouco a pouco la léngua mirandesa, bai sendo cada beç mais eigual a las outras, nas ferramientas que outeliza. La cumbençon fui de las mais amportantes, yá que bino ouniformizar la maneira de screbir.
La cumbençon
Un libro de 1984
Mas yá antes habien sido publicados ls studos de Philologia Mirandesa, de Leite de Vasconcelos, an dous libros. Bários testos de muitos scritores, zde l séclo XIX. Ne l séclo XX son amportantes ls trabalhos de l Pe. Mourinho i de bários studiosos, que a partir de ls anhos uitenta dórun l’ampurron final, que acabou cun la oufecializaçon de la léngua.
Philologia Mirandesa
Un libro de 1991
Ultimamente hai muita giente a screbir, quier libros, quier testos an blogs, na anternete. Mas cada beç se torna mais neçairo, haber nuobas ferramientas i libros. Haber un dicionairo ye fundamental para quien quejir saber cumo se scríben ciertas palabras i l que outras quieren dezir. Stá an cunstruçon l “dicionário de Mirandês-Português” de Amadeu Ferreira i José Pedro Cardona Ferreira.
L biquicionairo
Fazer un dicionairo ye un trabalho mui defícele i demorado i ten que tener la ajuda de muita giente. Mas ls sendineses son lebados de l diabro, nun ye que yá se botórun a fazer un biquicionairo, por la anternete, quier dezir, un biquicionairo on-line, que ye un sitio, onde cada pessona que quérga, zde que se registre, puode poner las palabras que sabe i l que quíeren dezir. http://incubator.wikimedia.org/wiki/Wt/mwl/P%C3%A1igina_Perc%C3%ADpal .
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
