Las nuossas tierras fúrun de las purmeiras de l purmeiro rei de Pertual, fui eiqui que naciu l nuosso paiç i fui mui acerca de Sendin que se fazírun ls purmeiros tratados, cumo l de Alcanhices. L Castielho de Algoso fui un de ls purmeiros a ser costruido i la sue anfluéncia iba até l riu Douro, falando ls decumientos anti(g)os que iba até onde la ribeira de l Redondal entra ne l riu.
La aldé de Teixeira
L retrato de la aldé de Teixeira fui tirado de la sierra de Palaçuolo i por trás, queda Algoso, falo-bos desto, porque la APEGA todos ls anhos faç ua caminada a que chama por tierras de l rei i ye ua caminada a pie i de burro, an que partecípan muitas pessonas de muitos paízes, que bénen porqui, a passar las bacanças de la Páscoa.
L grupo que benie de Palaçuolo
L HOIJE fui a fazer la sue reportage i ye desso que bos dou las amboras. La caminada ampeçou an Palaçuolo caras a Teixeira onde almuorçórun. Por la tarde houbo jogos tradicionales i ne l fin de la tarde seguiu para Atanor, onde houbo la cena i música cun danças tradicionales a la nuite. Muitos de ls caminantes traírun ls filhos que se deliciórun cun ls burros i cun ls gueiteiros, alguns pequeinhos cumo eilhes i que íaban delantre.
Por camin os anti(g)os
La caminada ye acumpanhada por bários téquenicos, biólogos, ambiantalistas, angenheiros, animadores sociales…que ban dando liciones durante la caminada. Falórun de ls porblemas ambiantales, de ls animales, de las plantas i fazírun pequeinhas repersentaçones, cumo ua, nua corriça abandonada i que serbiu para amostrar que l lobo nun ye tan malo cumo dízen.
Manhana cuntina por l cunceilho de Bomioso, sendo l castielho de Algoso, l sitio de la maior fiesta.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
