STRATERRESTRES NAS ARRIBAS?
Para quien nun stá aquestumado a ber estas cousas i las bei por la purmeira beç, puode parecer algo stranho ber por las arribas un abelheiro cun ls fatos de porteçon de las ferronadas de las abeilhas. Yá quantá que andaba para bos falar de las abeilhas i de las colmenas i calhou hoije.
Acabou de chegar de la Luna
Ne l meio de las arribas parécen straterrestres
Sendin siempre tubo muita colmena por las arribas i datrás éran solo de corcho, mas hoije yá hai colmenas aporpiadas i cun todas las cundiçones para tratar melhor de las abeilhas. Hoije l miel ye ua fuonte de rendimento para alguas pessonas. Inda que haba quien querga fazer de la nuiossa region, un sitio solo para ls ricos passáren las bacanças, ls sendineses ban fazendo por la bida, mesmo sien ajudas de naide.
Aldino i la mulher a tratar de las colmenas
Siempre me lembra de haber colmenas por las arribas i nun ye por acaso que hai mesmo un chamadeiro, ne l nuosso termo, de Abilheira . Se la criaçon de abeilhas nun era cousa de muita giente, tenie a ber cun la maior ou menor sensiblidade de las pessonas a las ferronadas de las abeilhas.
Yá eimaginestes l que serie sien ls fatos de porteçon?
Nun bos bou a screbir subre la criaçon de las abeilhas, mas bengo a dar-bos la ambora de que porqui, la criaçon de abeilhas ye anteressante porque las arribas son un sitio special i ber ls abelheiros a trabalhar parece mesmo que stamos noutro mundo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
