Se houbisse dúbedas subre l’eiquenomie global ou melhor, subre l mundo global, an que la ademenistraçon de ls stados bai sendo sustituida cada beç mais por ourganizaçones regionales ou por federaçones de stados, era tener ido a la Luç para ber pertueses i spanholes armanados nua troca i benda de pordutos i até de tradiçones i culturas.
L retrato fui tirado na fiesta de la Luç
Mas nun éran solo pertueses i spanholes, habie giente de bários paízes i até, cousa ampensáble hai uns anhos, habie índios de la América de l Sul, que tocando i cantando las sues canti(g)as, alguas cun raízes ne l Praino, si, porque deiqui partírun tamien pessonas a poboar las tierras de América.
Ls índios a tocar
Las facelidades de quemunicaçon fázen cun que ls pobos se múoban de uns paizes, uas bezes por questiones eiquenómicas i outras por un sentimento de abentura, tal cumo ne ls séclos XV i XVI fazírun ls pertueses al íren por todo mundo, tamien hoije ls pobos de América bénen até nós, trendo las sues tradiçones i cultura.
Ls traijes chamában a la atencion
Esta troca de culturas ye cada beç maior i l mundo cada beç se tornará nun mundo mais eigual. Nun adelantre tener miedo ou pensar que las cousas nun múdan, porque l feturo ye para adonde caminamos i nó para trás, para l passado, esse nun buolbe mais. Puode ser un feturo cun deficuldades, mas serán siempre çfrentes.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
