Ye na Primabera que las quelores de las flores de l Praino mais mos ancántan, quier por la sue bariadade, quier por l sou quelorido. Naide puode quedar andefrente a la marabilha que son ls campos, ls prados i subretodo las arribas de l riu Douro cubiertas de flores.
L amarielho de las scobas
Las scobas floridas, uas amarielhas outras albas de niebe, cúbren las arribas,matizadas por las quelores de las xaras, de ls stourotes, pimpilros i ua anfenidade de flores de todas las quelores i feitius. Fui nesta paisaige berdadeiramente debina, que las tecedeiras fúrun acopiar ls zeinhos cun que fázen ls tapetes i las colchas.
L ancanto de las arribas
Fui eiqui que las moças fúrun acopiar las quelores i ls anfeites de ls lenços i saiotes que durante cientos de anhos usórun i que hoije son la marabilha de sposiçones i de ls traijes de ls ranchos de danças i cantares de las aldés de l Praino. Todo este quelorido nun cabe ne ls megapiqueç de ls retratos.
La marabilha de l quelorido
Poderie amostrar-bos cientos de retratos, tirados nestes dies de Primabera, caminando por las arribas, solo ou acumpanhando grupos de turistas ou studiosos, que todos ls dies porqui ademíran ou stúdan la flora de l Praino. Mas deixo-bos la curgidade de benirdes a tirar, bos mesmos, outros talbeç melhores.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
