L agrupamento de scuteiros de Sendin fizo ne ls dies 9 i 10 l die de l splorador (nun se tratou de splorar a naide) i an colaboraçon cun l CNE (Corpo Nacional de Escutas) de la region de Bergáncia, ajuntou bários agrupamentos de l çtrito. L ajuntamento fui ne l campo de campismo de Sendin.
La antrada de l campo
Todo staba bien ourganizado
Pouca giente se ten dado cunta de las atibidades de l agrupamento de scuteiros de Sendin, mas yá ten bastantes moços i moças, que durante l anho ban fazendo bárias atibidades i este die de l splorador fui ua deilhas i que trouxo a Sendin muito moço i moça de l çtrito.
La chegada de ls agrupamentos
Un grupo a montar las tendas
Ne l purmeiro die fui l mais amportante i ls moços i moças fazírun ua caminada zde Sendin a Pradogaton i zde alhi a la Trindade , almuorçando pul camino i fazendo l trabalho de sploraçon, que cunsistie an studar la fauna i la flora al mesmo tiempo que caminában puls caminos de toda la bida.
Las bandeiras de ls agrupamentos
Ls grupos a recebir las anstruçones para la caminada
Ne l Demingo i apuis de tenéren dormido ne l acampamento, fazírun un percurso até a la eigreija adonde assistírun a la missa. Fazírun un almuorço coletibo i çtribuírun lembráncias, tornando a las sues tierras cuntentos por habéren stado cun nós.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
