Este anho l die de la Trindade ye l die 7 de Júnio, die de eileiçones para l Parlamento Ouropeu. Cuido que nada bai a tirar de se fazer la fiesta de la mesma maneira, inda que puoda haber pessonas que por bias de stáren nas mesas de boto, nun poderán ir alhá.
La eimage de la Santíssima Trindade
Stube cun ls mardomos de la fiesta i falemos de muita cousa subre la tradiçon, la fiesta i l que ténen feito ne ls dous últimos anhos. Zde la costrucion de las casas de banho até al arranjo de un bar na bielha leitarie i al arranjo de l sitio an buolta de la capielha, que stá bien amanhado, muito se fizo.
L Padre eiterno
Mas l percipal fui l trabalho de ls mardomos para animáren las maltas de las bárias aldés a partecipar na fiesta. La fiesta fui siempre de las mais amportantes i tradicionales de l Praino. Era alhi que se ajuntában las maltas de las aldés alredor de l cabeço i que cun las sues bandeiras dában la ronda alredor de la capielha. Que todas partecípen ye l oujetibo.
Las pinturas na capielha
Datrás habie las puortas de antrada para l largo de la capielha por adonde antraba cada malta i habie un camino caras a las aldés. La antrada de Sendin i Picuote, la de Atanor i Teixeira, la de Pradogaton i Palaçuolo, la de Bilachana i Freixiosa i la de Fuonte Aldé por adonde benie tamien la percisson, esto que a mi me lembre. Buolber a la tradiçon de las puortas ye l que se quier fazer, assi cumo demarcar cun fincones l largo, cumo yá stubo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
