Ls alunos de la scuola de Sendin fúrun onte a Miranda para cun ls ninos de todo l cunceilho fazéren un cumbibio i atibidades cunjuntas para quememoráren l die, cun l’ajuda de la Câmara Munecipal que quijo fazer deste die, cumo noutros anhos, un die çfrente para todos ls ninos de l cunceilho.
Ls ninos iban-se ajuntando ne l anti(g)o campo de la bola
Cumo nun podie deixar de acuntecer, ls palhaços aparecírun a recebir ls ninos i a mascarar-los, para que l die ampeçasse cun alegrie. Lougo alhi ampeçórun las quememoraçones cun ls ansuflables a chamáren la atencion de todos i ls ninos nun se fazírun rogados i ala a saltar, ancarrapitar i brincar.
Ls palhaços tirában l retrato culs ninos
I pintában-los
Apuis fúrun ls jogos i l cumbíbio antre todas las scuolas de l cunceilho Solo fui pena las árboles inda stáren pequeinhas, porque sien selombras, la calor apertaba i habie que bober muita áuga. Tamien fui pena que ls retratos nun tubíssen salido mui bien.
Ls ninos de la anfantil de Sendin (quedou tremido)
Un de ls muitos trabalhos de las sposiçones
L almuorço fui ne l multi-usos onde cuntinórun las atibidades.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
