A LA CUMBERSA CUN …
Acabamos hoije la anterbista cun António Bárbolo Alves, que publiquemos ne ls dies 28,29 i 30 de Maio i que hoije cumpletamos. Para la antenderdes melhor podeis ler-la zde l die 28 para acá. L HOIJE bai a porcurar fazer la próssima cul persidente de la Câmara , que tamien fala bien l mirandés, nun fura el de San Martino.
Guia de l arquibo António Maria Mourinho
Las rues de Picuote fúrun las purmeiras a tener l nome an mirandés
H – Sabemos que hai muitos mirandeses a screbir i a traduzir outores strangeiros, cumo nós mesmos, que yá tenemos quaije las fábulas de Eisopo traduzidas, nun bos parece amportante?
ABA – Todo l que se faç ye amportante i quien sou you para amponer seia l que seia, mas mais amportante serie pensar-se an fazer ua gramática normatiba de l uso, ua gramática stórica, ua gramática scolar, un dicionário bien sistematizado i struturado, manuales scolares…
L libro de ditos dezideiros, son 4 000 recolhidos por l Pe. Mourinho
H – L Centro de Studos António Maria Mourinho de que sodes diretor, ten publicado alguas obras amportantes, an que situaçon se ancontra?
ABA – You nun sou propriamente diretor yá que l Centro ye dependente de la Câmara Munecipal i de la UTAD i ten un regulamento próprio i que diç que l diretor debe ser eilegido cada dous anhos i la mie bolsa de studos acabou yá, mas mantego-me anquanto nun se define la situaçon de l Centro.
Quemédia repersentada an sendin an 1928
H – Mas sabemos que las atibidades cuntínan, que stais a porparar?
ABA – Stamos a porparar la publicaçon de l libro “Eilementos de Gramática Mirandesa” i que l Pe. Moisés deixou pronto. Percisaba de alguas achegas, mas resolbimos publicá-lo tal qual el l deixou, porque ye un decumento stórico amportante.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
