L HOIJE fui a Palaçuolo i dou de caras cun la porparaçon de la sadinada que la comisson de fiestas iba a dar a toda la giente que se arrumasse a la praça, adonde staba yá muita giente i se porparaba la aparelhage para la musica i para la atuaçon de la “bielha Gueiteira” i de de l “anda camino”.
Ls assadores stában prontos
Giente nun faltaba
Mas la fiesta ye berdadeiramente ne l die 2 de Setembre, mas yá uns quantos dies que se ban fazendo atibidades por todo l pobo i para todas las pessonas i eidades. Durante dous dies stubo l camboio eilétrico, que la câmara bai ponendo al serbício de todas las aldés i fui ua alegrie ber ls ninos ne l camboio cheno a cantar “apita o comboio”.
Ye na eigreija, agora bien amanhanada, que die dous se fai la fiesta relegiosa de Nuossa Senhora de l Rosairo
La sardinada staba buona i chegou a la farta para todo mundo, ye assi que las pessonas cumbíben siempre que nun hai outros anteresses por detrás de las cousas. I Palaçuolo nun destinguie se éran de la aldé ou de ls alredores, stában na fiesta, sardina assada de grácia. A la antrada de l pobo staba bien declarado que habie fiesta.
Mesmo de nuite podie ber-se
Na outra punta de l pobo staba un letreiro a dar las buonas benidas a todos i por l que mos tocou, fumos bien recebidos i nun deixaremos de ir a la procisson, l die 2.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
