La raça de baca mirandesa ye ua de las maiores riquezas de l Praino, mas ten benido a perder muito de l sou balor por bias de se tenéren metido anteresses que nada ténen a ber cul Praino i muito menos cun la raça. Hai que ajuntar todas las fuorças para defender la raça de la baca mirandesa, porque solo desse modo haberá feturo para eilha.
Un buono eisemplar de la raça
Todos oubimos falar ne l que se passou cun l reconhecimiento de la raça jarmelista, que ten debedido ls antendidos subre las raças de cada region. Este ye un eisemplo de que hai muito que fazer para que ls nuossos agricultores téngan brio i apoio para defendéren la raça de la baca mirandesa, mas starán eilhes motibados? Quererán mesmo preserbar i criar la baca mirandesa?
Este parece que si
(retrato de Ana Preto)
Ne l ultimo cuncurso de la raça de baca mirandesa ne l cunceilho de Bragança, l que ganhou l purmeiro prémio de bobinos de mais de 5 anhos dezie: “Só quero raça mirandesa. Fui criado nisto e é a raça que eu gosto”, este home ye de Zeive de l cunceilho de Bragança, l cunceilho que ten mais bacas mirandesas.
Tenemos que preserbar l que tenemos de buono
Mas cun la seca, la raça stá an peligro, ls apoios tárdan an chegar, ls projetos de la “Associação de Bovinos de Raça Mirandesa” apresentados al PRODER tárdan a ser aprobados, quien bota la mano a estas cousas? Nun puode ser cun ajudas andiretas, porque las bacas nun púoden bibir sien comer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
