Cun l’apoio de la Junta de Freguesie que ye de l PSD i presidida por tiu Fidalgo, mirandés de ls balientes, que fala l mirandés perfeito i que ye siempre nessa léngua que fala als de la sue aldé, fizo-se l salimento de l lhibro de Tortulhas. Fui lindo de ber un presidente de Junta apresentar l scritor de la sue tierra, falando para todos nun mirandés que dou gusto oubir.
L sitio de l salon de la Junta
L salimento tubo la preséncia de muito ami(g)o de l scritor, de San Pedro i de fuora i cumo nun podie deixar de acuntecer, la apresentaçon de l lhibro fui feita por Amadeu Ferreira i l HOIJE alhá staba tamien para bos dar la ambora.
L presidente de la Junta , Tortulhas i Amadeu
Estas einiciatibas son mui amportantes i cumo podeis ber nada ténen a ber cun ls partidos, mas cun las pessonas i quando eilhas son cumpetentes i gústan de cultura ye fácele antendéren-se i lebar la staia até al fin.
L salon staba cheno
Sendin ye la tierra que ten mais giente a screbir mirandés i a studar-lo, ten por esso l deber de ser l luzeiro de la cultura i de la léngua, tamien ye nesso que debemos pensar i nó an anteresses de dous ou trés.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
